සෝරෝ [03 කොටස - බස් පදින්න පටංගත් හැටි..]

අන්තර්ජාලෙට සම්භන්ධ වෙලා මුලදී වෙන නමකින් ඇවිත් පස්සේ Zoro වෙලා  චැට් වල ෆෝරම් වල ඉඳලා අන්තිමට බ්ලොග් උණකුත් හැදුන නේ Cleo අක්ක නිසා.. ඔහොම බ්ලොග් උණ හැදුනට පස්සේ Cleo අක්කගෙන් අහගෙන බ්ලොග් එක හදාගත්තා.. ඕකට නමක් දාන්න ගිහිං තමා ඊළඟ කට්ට කෑවේ.. කල්පනා කරලා කල්පනා කරලා දාගත්තා නමක්..

ඒකේ නම තමා සිරගත කල සිතුවිලි මුල් කාලේ ටිකක් අල්ලලා ගියා මට බ්ලොග් ලියන එක.. ඒත් වැඩි දවසක් ඒක කරන්න වුනේ නෑ.. ඒ දවස් වෙනකොට මම කලිං වැඩ කරපු රැකියා පියස ආයතනයෙන් අයින් වෙලා (2007 අවුරුද්දේ අන්තිමට විතර අයින් වුනා) යාළුවෙකුගේ කොමියුනිකේෂන් එකක තමා කාලේ ගත කලේ.. කොහොම හරි බ්ලොග් එක අමතක වෙලා පුරුදු පරිදි ෆෝරම් එකේම කාලේ ගතකරන්න පුරුදු වුනා.. ඔය කාලේ තමා ශ්‍රී චැට් එකෙන් චැට් කරපු කෙනෙක්ට හිත ගිහිං ඒක ගැන හිතන්න ගත්තේ.. හැබැයි පොඩි ප්‍රශ්නයක් නිසා එයා මට කැමති වුනේ නෑ.. ඒත් ඉතිං තාමත් ඉඳලා හිටලා ඇවිත් කථා කරලා යනවා.. පහුගිය දවසක උපන්දිනෙත් තිබුනා.. 

කොහොම හරි අමතක වුන බ්ලොග් කෙරුවාව ආයේ පටං ගන්න ඕන කියලා හිතුනා මට.. එහෙම හිතලා මගේ කවි දාලා ආයේ පටං ගත්තා වෙන බ්ලොග් එකක්.. මොකද අර කලිං හදපු බ්ලොග් එකේ යූසර්නේම් පාස්වර්ඩ් අමතක වෙලා තිබුන නිසා.. ආයේ අලුත් නමක් කල්පනා කරද්දී තමා සිතුවිල්ලක අරුම නම කල්පනා වුනේ.. පස්සේ කාලෙක කවි වලට අමතරව වෙන වල් පල් ලියන්නත් වෙන බ්ලොග් එකක් පටංගන්න ඕන කියලා හිතිලා තමා මේක පටං ගත්තේ.. මේකට මුලින්ම මම දාපු නම තමා  “ජීවිතය වචනයෙන්“  කියලා.. පස්සේ ඒක හරිගියේ නැති නිසා දාගත්තා “සෝරෝගේ වල් පල්“ කියලා.. ඒත් ඒ නම හරි නෑ කියලා තිස්ස අයියා කිවුවයින් පස්සේ තමා කල්පනා කරලා කරලා මේ නම දාගත්තේ..

2009 අන්තිම හරිය වෙද්දී FN එකට ඇතුළු මුළු සිංහලයා එකටම ආයුබොවන් කියන්න සිද්ධ වුනේ ඒකේ මුල් පුටුවත් එක්ක ඇති වුන මත ගැටුමක් නිසා.. ඔහොම හැබැයි ඉතිං ඒකට ආයුබොවං කිවුවට ඒ හරහා ඇති වුන මිත්‍රකම් අදටත් තියෙනවා.. ඒවා හෙටටත් තියේවි..

FN එකෙන් අයින් වෙච්ච නිසා ඉතුරු වුන කාලය ගත කරන්න ඒ වගේ තව ෆෝරම් එකක් සෙට් වුනා.. ඒ සයිට් එකේ නම අනේමන්දා.කොම්. දැං නම් ඒ සයිට් එක වැඩ නෑ.. ඒකේදී තමා මට නලියා සෙට් වුනේ.. පස්සේ ඒවා මොනවත් නැතුව බ්ලොග් එකටම වෙලා ඉන්නකොට තමා බ්ලොග් මැරතන් එක ගියේ.. ඒ 2010 අවුරුද්දේ.. මට ඉතිං ලියන එක ඒ හැටියට කරන්න බැරි නිසා ඒකට සම්භන්ධ වුනේ නෑ.. හැබැයි ඉතිං වතුර නම් ලෙසටම ගැහුවා.. මට මතතක හැටියට ඒ මැර්තන් එකෙන් දින්නේ බිඟුවා ද කොහේද..

මැර්තන් එකට පස්සේ ආවේ ලාංකීයෙන් කරපු කවි මඬුව.. යාන්තන් එහේ මෙහේ කරලා කවියක් අමුණගන්න පුළුවන් නිසා කවිමඬුවට නම් සහභාගී වුනා.. කවි කියන අතරේ මඩ ගහගන්නවා, මඩ නානවා.. ඒක නම් ආතල් ලෝකයක්.. කවි මඬුව හරහා ෆිට් වුන අයගෙන් එකෙක් තමා වැපා.. ඔය ෆිට් එක නිසා ඌ එක්ක චැට් කර කර ඉන්න අතරේ දවසක් කිවුවා බස් එකක් ගැන.. පස්සේ විස්තර අහලා බලද්දී මේ පාරේ යන බස් නෙවෙයි ගූගල් එකේ සේවාවක්..

අදත් කඩන්න වුනා නේ.. ඉතුරු ටික හෙට දාන්නම්..