පරිස්සමෙන්....!!

සෑහෙන්න කාලෙකින් මේ පැත්තට එන්නත් බැරි වුනාට හැබැයි මේ දවස් වල මං ඉන්නේ ගෙදර. ලබන මාසේ පොඩි විභාගෙකුත් තියෙන නිසා මේ දවස් වල පොඩ්ඩක් ඒකට ඔට්ටු වෙනවා. පහුගිය ටිකේ බ්ලොග් කියවන්නත් වුනේ නෑ. ‍ඒකට නම් හේතුව හැබැයි කම්මැළිකම. දැං ආයේ ටික ටික පටංගන්නෝන බ්ලොග් කියවන්න. මගේ මේ බ්ලොග් එක උපන්දා සිට එකම විදියේ තීම් තිබුන නිසා මට ඕන වුනා වෙනස් ආකාරයක තීම් එකක් දාගන්න. එහෙම හොය හොය ඉන්නකොට තමා මේක හම්බුනේ. මේක ඕන විදියට වෙනස් කරගන්න හැලුප් කරපු මරේ ට බොහොම ස්තූතියි...!!

http://www.redicecreations.com/specialreports/2006/01jan/devil.html

පොඩි කාලේ අපි, අපි‍ට හමුවෙන ඕනම කෙනෙක් එක්ක කතා කරන්න බැරි වුනත් කට පුරා හිනා වෙන්නෙ අපේ හිතේ තියෙන අව්‍යාජ කම හින්ද වෙන්නැති. ඒ නැතත් ලංකාවේ අපි ඉස්සර කාලේ ඉඳන්ම ආගන්තුක සත්කාර වලට ප්‍රසිද්ධයි කියලා මං අහලා තියෙනවා. ඒක නිසා වෙන්නැති නොමිලේම කරන්න පුලුවන් සංග්‍රහයක් වන සිනහව නිතරම වගේ අපේ මුවේ රැඳිලා තියෙන්නේ. ඒත් ඉතිං දැං දැං ඒ හිනාව වුනත් තෝරලා බේරලා කීප දෙනෙකුට දෙන්න වෙන තරමට මිනිස්සුන්ගේ හිත් දූෂ්‍ය වෙලා. අපි මිත්‍රයින් කියලා ආශ්‍රය කලාට සමහර අය ඒ මිතුරු කම හරහා වෙනත් ප්‍රයෝජන ගන්න පෙළඹි‍ලා. තමාත් තවත් කෙනෙකුත් අතර තියෙන මිත්‍රත්ත්වය කියන දෙය මැදට මුදල් කියන දේත් ආවොත්...? අන්න එතනදී වෙන්නේ අන්තිමේදී අර දෙකම නැති වෙන එක. ඇතැම් අයට ඒවා සාමාන්‍ය දේවල් වුනත් බොහෝ දෙනාට නම් වගේ දෙයක් වුනාම යම් පාඩමක් ඉගෙනගෙන එහෙම අය ඈත් කරන්න උත්සාහ ගන්නවා මම ඕන තරම් දැකලා තියෙනවා. මමත් හිතන්නේ ඒක එහෙමම තමා වෙන්න ඕන. අපිට මිනිස්සු හදන්න බැරි නම් අපි එහෙම අයගෙන් ඈත් වෙන්න ඕන කියලයි මමත් විශ්වාස කරන්නේ.

මම මේ කියන දේට ඕන තරම් උදාහරණ අද වන විට තියෙනවා. මම හිතන්නේ මේක කියවන අයගෙනුත් බොහෝ අය ඒ ආකාරයේ යම් යම් සිද්ධි වලට මූණ දීලා ඇති. ඒත් අද මම මේ මොහොත වන විටත් ඔය කියන වගේ ජාතියේ කෙනෙකුට අහු වෙලා. හැබැයි මෙච්චර කාලයක් මම ඉවසගෙන හිටියා අදාල පුද්ගලයා ඒ තත්ත්වයෙන් ගොඩ එන්න උත්සාහා දරාවි කියලා. අද මේ මොහොත වෙනතුරා නම් මම දන්න විදියට ඒ කෙනාට යහපත් තත්ත්වයට එන්න කිසි ඕනෑකමක් නැති නිසයි මම මෙහෙම ලියන්න හිතුවේ. අනිත් එක එයා හැදෙන තුරු මට මගේ ජීවිතේ, මගේ කාලය බිල්ලට තියන්න මට කොහොමටවත් බෑ. මේ තරමටහරි මම ඉවසුවේ මම හොඳ නිසා. සමහර විට ඒක මගේ දුර්වලතාවයක් වෙන්න පුළුවන්. අන්න ඒ දුර්වලතාවයෙන් එහෙම නැත්තං මගේ හොඳකමින් ප්‍රයෝජන ගත්තා මිසක් හැදෙන්න කිසි උවමනාවක් අරං නෑ.

මම දන්නවා මේ කියන කෙනාට තවත් බොහොමයක් අය අහු වුනා සහ දැනටමත් අහුවෙලා කියලා. මම මෙයාව ළඟින්ම ආශ්‍රය කල නිසා ඒ සමහර අයගේ ප්‍රශ්න කෙලින්ම මට ‍යොමු කල අවස්ථාත් තියෙනවා. ඒ ඇරෙන්න මෙයාට එහෙම අය නිසා වෙච්ච කරදරත් මම දැකලා තියෙනවා. ඒත් පුදුමේ කියන්නේ මේ පුද්ගලා ඒ දේවල් වලින් ඈත් වෙන්නේ නැති එක. සමහර විට මේක දැං එයාගේ ප්‍රධාන ආදායම් මාර්ගය වෙලත් ඇති. ඒත් එහෙම වෙන කෙනෙකුට වංචාවක් බොරුවක් කරන්න තරම් කෙනෙකුගේ හිත දැඩි වෙන්නේ කොහොමෙද කියන එක නම් මට ලොකු ගැටලුවක්. 

මම මේ මච්චර වෙලාවක් දාලා තියෙන මේ පෝස්ට් එක බලන ඔයාට හිතෙනවා ඇති "මොන අ‍ඳෝනාවක්ද මේ" කියලා. ඒත් මම මෙහෙම මේ ගැන කිවුවේ අද මට වුන දේ හෙට ඔයාට වෙන්න පුළුවන් නිසයි මම මේ ගැන දැනුවත් කලේ. මොකද අපිට මිනිස්සු කාලා බලලා අඳුරගන්න බෑ. ටික දවසක් ආශ්‍රය කරන්න වෙනවාමයි. හැබැයි කාලයක් යද්දී, සමාජය එක්ක ගැටෙද්දී අපිට පුළුවන් වෙනවා "ගොනා හැරෙනකොටම කියන්න මූ මේ එන්නේ පොල් පැලේ කන්න තමා" කියලා. වාසනාවකට වගේ මටත් දැං කෙනෙක් දිහා බලලා පොඩි තක්සේරුවක් කරගන්න පුළුවන්. හැබැයි ඒක හැම වෙලාවෙම සාර්ථක නොවෙන්න පුළුවන්.

අන්න ඒක නිසා මම ආයෙමත් කියන්නේ ලෝකය ගෝලාකාරයි මිනිස්සු විවිධාකාරයි ඒක නිසා පරිස්සමෙන් ආශ්‍රය කරන්න. වැඩි විස්තර පසුව කියන්නම්.

ප.ලි - මේ පුද්ගලයාට මම වගේම කියවන ඔබත් අහු වෙන්න පුළුවන්. මොකද මිතුරු වෙසින් ඔබ අසලත් ඔහු සිටින නිසා..